شرح الاقسام وبعض قوانين اخوية [الأرشيـــــف]

عرض كامل الموضوع : شرح الاقسام وبعض قوانين اخوية

hanny dagher

06/06/2006, 07:50

مرحبا يا اخواتي كيفكن
بسبب هالعجقة والهللخبطة اللي عم تصير صار لازم نوضح بعض النقاط المهمة مشان يضل اخوية مرتب ومشان ما حدا يزعل من اي اجراء بياخدو مشرف من المشرفين او من اي رد بينرد من اعضاء اخوية يعني صار لازم نوضح وظائف الاقسام وبعض القوانين العامة والخاصة

شرح الاقسام (رح انزل فيهن بالترتيب من الاعلى اي الصالون وحتى بريد المنتدى )

الصالون :
الصالون مخصص للمواضيع اللي ما الها منتدى تاني يعني مواضيع نقاش عامة
يعني ممنوع حط خواطر ممنوع حط قصص ممنوع حط اغاني ممنوع حط الخ الخ الخ الا اذا كان من وراها فكرة نناقشا
يتضمن الصالون التشريفات هاي التشريفات تتضمن الترحيب بالاعضاء الجدد والمعايدات باعياد الميلاد يعني كمان ممنوع حط كذا وكذا وكذا

فن :
بيتضمن الفن كزا قسم فرعي
1-المكتبة : بتتضمن كتب ادبية فلسفية وما الى هنالك وما الى هنالك من ملحقات المطالعة يعني متل المكتبات العامة الموجودة بكل مدينة بس هون بشكل الكتروني
-ضمن المكتبة في عنا قسم قرأت لك هادا القسم مخصص لشي واحد قري كتاب وعجبتو فكرة محددة في بيحط الكتاب ومنصير نتناقش في

2- ادب : بيتضمن
أ-الادب الساخر : بيتضمن جميع المقالات والقصائد والخواطر اللي تسخر من مشكلة اجتماعية او سياسية عامة ويمنع منعأ باتا وضع اي نكتة او حزيرة او اي خاطرة حب او غير ذلك
ب_ الخواطر والخربشات : وتتضمن جميع الخواطر التي يكتبها رواد المنتدى ويمنع منعا باتا اقتباسها من شاعر او كاتب معروف لانو هدول محلهن بقرأت لك
ج - القصة والقصة القصيرة : تتضمن جميع القصص والقصص القصيرة التي يكتبها رواد المنتدى ويمكن ان تكون منقولة
د - الشعر : يتضمن اشعار مكتوبة غرامية ثورية او اي شيء من هذا القبيل شعر قديم او حديث

3-رسم وتصوير :
يتضمن الصور والرسومات والتخيلات وكل ما يتعلق بعالم الالوان والكاميرات وتوابعها
يتفرع عنو كاريكاتير
يتضمن الصور الكاريكاتيرية ولا يجوز الخلط بينها وبين الرسم والتصوير

4-موسيقى :
اغاني والحان وتوابعها يعني كل ما يتعلق بعالم الصوت والصوتيات والالات الموسيقية
يتفرع عنو اغاني وكلمات
كلمات الاغاني التي نسمعها يوميا

5-سينما وافلام :
كل ما يتعلق بعالم صناعة الافلام من اخراج وممثلين واحدث الافلام والجوائز والمهرجانات وما الى هنالك

6-اخبار الفنانين والنجوم :
مطرب عمل حادث مطربة طالعت فيديو كليب هيفا نانسي اليسا راغب
كل اخبارن بتنحط بهالقسم

علوم : بيتفرع عنو :
1 - تاريخ : يتضمن جميع المعلومات التاريخية ومعلومات عن مشاهير عاشو قبلنا بكزا سنة
كل شي منعرفو عنهن منحطو بهالقسم

2- لغات : يتضمن دروس لتعليم اللغات الانكليزية العربية والاشورية

3-فلسفة وعلم نفس : كل ما يخص المشاكل الفلسفية التي تواجهنا وحقيقة الكون وما الى هنالك بالاضافة الي قصص الفلاسفة والاساطير

4- علوم وتكنولوجيا وما يتفرع عنها : يتضمن اخر ما توصل العلم والعلماء
معلومات علمية يعني المعلومات بتصير تنحط هون ما بتنحط بالصالون ويضاف للمواضيع اللي بدها تنحط هون روابط مؤكدة ومدعمة من مصادر موثوقة والا الموضوع ما رح يهدي غير بالسقيفة

مجتمع وسياسة : بيتفرع عنو :
1-سياسة : كل ما يتعلق بالدول والرؤساء والعلاقات الدبلوماسية وتوابعها يعني متل نشرة الاخبار
2-عناوين الاخبار : هادا الموجز تبع الاخبار و عناوين الصحف يعني كل شي عم يصير جديد
3- منبر اخوية الحر : الي عودة علي

المنتديات الروحية :وتتضمن
1- اللاهوت المسيحي المعاصر : يتضمن كل ما يتعلق بالمسيحية من رسائل وشرح اناجيل وما الى هنالك ويمنع منعا باتا حوار الاديان في هذا القسم
2- حوار الروح : انتي وقاعد بينك وبين حالك بتخاطب الله وبتحاورو ففيك تحط حديثك معو هون (خاص بكل الاديان ) يمنع منعا باتا حوار الاديان في هذا القسم ويمنع تنزيل مواضيع بهدف التبشير او الدعوة لديانة محددة علاقتك بالله وبس وتروك غيرك بحالو
3-حوار الاديان : مغلق حاليا .

hanny dagher

06/06/2006, 08:10

تابع :

اقتصاد : ويتضمن على :
1- اخوية الاقتصادية العامة : بورصة واسهم ومضاربات وداو جونز طلع وخام برنت نزل والدولار ثبت وما الى هنالك كلو بينزل بهالقسم
2-بسطة اخوية ....... : يعني بكلمة تانية دومري الاخوية كل ما يتعلق بالاعلانات التجارية شي بدو ينباع شي بدو ينشرى بينزل هون بهالمكان هادا

رقميات : يحتوي على:
1- موبايلات وحركات : كل ما يتعلق بعالم الموبايل من رسائل ونغمات واخر الاجهزة النازلة
2-ستالايتات وقنوات : كل ما يتعلق بعالم الدشات والقنوات التلفزيونية المشفرة وغير المشفرة وكروت فك التشفير وكيفية برمجة الديجيتال وغيرو من هالحكي
3-كمبيوتر وتوابعو (انترنت وبرمجة الخ ) : هادا كل شي بيتعلق بالكمبيوتر يعني من اجهزة هارد وير لانترنت لبرمجيات وبرامج اضافة لدروس ومعلومات عن اخر اصدارات مايكرو سوفت وغيرا
4 - التصميم والجرافيكس : كل مين مصمم شغلة حلوة او موقع حلو بيحطو بيفرجينا يا وكل مين عم تواجهو مشاكل بالتصميم بيحطا بلكي منقدر نساعدو

رياضة : فروعو :
1- كاس العالم : هادا القسم جديد ورح يبقى كل فترة كاس العالم بيتضمن اخر اخبار مباريات كاس العالم واخر اخبار نجوم المنتخبات واخر النتائج
2- سيارات وشبيحة : اخر اصدارات السيارات بالصور والموصفات يعني كام سيلندر وقديش بتمشي بالتنكة وقديش السرعة وهيك اشيا
3- الساحة الرياضية واخبار الرياضة : كل اخبار الرياضة العامة الفورمولا التنس الباسكت بول البولينغ بول البيس بول يعني كل اشكال الرياضة

استجمام : ويتضمن
1- على الطاير : هون منمزح مع بعض ومنكت ومنبايخ على بعض وكل هالاشيا بهالقسم هادا
وحزازير خفيفة وخلافو
2- سفراء اخوية : متل ما بتعرفو اعضاء اخوية منتشرين بكل انحاء العالم يعني كل واحد من محل ما هوي يجبلنا صورة مشان نتعرف على هالبلد اللي هوي في ويخبرنا شوية معلومات عنو

العاب : ويحوي مايلي :
1- العاب اخوية اركيد : شغلة العاب فلاشية على البسيط بس فوت جرب بلكي بتاخدلك شي كاس وفوت تحدى مشان تكسر روس
2- العاب كومبيوترية : كل العاب الكومبيوتر واخر الاجزاء منها مع كلمات السر وبعض الاسرار والخدع كلو بتلاقو هون
3- مسابقات : حزازير حسابية ومسائل صعبة بدها تشغيل مخ يعني مو بس للضحك كلو موجود هون

درجة تانية : مايلي :
1 - السقيفة : تحتوي المواضيع المكررة مواضيع العلقات مواضيع ما الها طعمة كلها منزتها على السقيفة
2 - المعتقل : هون بيقدرو يكتبو الاعضاء المحظورين

منتديات ادارية :
بريد المنتدى : اذا عندك شكوى الموقع ما عم يفتح نسيان كلمة السر ومحبوس برا عندك اقتراح لتطوير الموقع بتحطو هون وممنوع منعا باتا الحوارات الشخصية في هذا القسم
ومو كل ما حدا حط موضوع تقعدو تعلقو علي عندك معلومة تفيد هالشخص حطا ما عندك خليك ساكت

هادا كان شرح الاقسام رح نجي للقوانين
يتبع ..............

hanny dagher

06/06/2006, 08:26

قوانين اخوية والخطوط العامة :

ممنوع كتابة اي موضوع في غير قسمو كيف بعرف اينو قسمو بسال هالكام عضو القديمين باخوية يعني مشرفين وكل من سجل بسنة 2005 لحد الشهر التاني من 2006 لانو هدول بيكون بيعرفو الاقسام بشكل منيح شو هيي
ممنوع نكش اي موضوع تجاوز الصفحة التانية بالقسم الا اذا كان ما زال فعال
ممنوع الخروج عن المواضيع بحديث وسبام الا في الاقسام التي تتحمل ذلك يعني ما نجي نطلع عن الموضوع ونصير ننكت ونهرج بالمنبر
ممنوع تنزيل مواضيع دينية في اي قسم او اي موضوع بيشم ريحة الدين يعني كل شي بيتعلق بالدين هادا بينك وبين حالك ولازم يضل بينك وبين حالك واي موضوع بينزل بينتقل على السقيفة اذا ما انحزف
ممنوع مهاجمة اي دين او طائفة او ملة او عقيدة موجودة بالمنتدى حتى الملحدين لا بهدين ولا بقرب علين ما بدك تكون ملحد التهي بحالك وتروك غيرك في مين بيحسابو
ممنوع مهاجمة اي عضو من الاعضاء بشكل جارح او استخدام كلمات نابية خارجة عن اخلاق المنتدى كلنا شباب وصبايا جامعيين ومثقفين ومنفهم بالحوار ما في داعي للتجريح ببعض
ممنوع تنزيل مواضيع مكررة وكيف بدي اعرف اذا مكررة او لاء بسال هالكام عضو القديمين باخوية يعني مشرفين وكل من سجل بسنة 2005 لحد الشهر التاني من 2006 لانو هدول بيكون بيعرفو المواضيع المكررة شو هيي
بالنسبة للمنبر الحر بتقدرو تلاقو القوانين بهالموضوع بينضاف اليها القوانين اللي حططيتا فوق ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
هلأ اي مخالفة لهالقوانين من مين من كان
اول الشي اذا خالف بتنزيل موضوع الموضوع رح ينتقل للقسم المناسب ورح ينزاد التنبيه للعضو المخطئ
تاني الشي اذا خالف برد الرد رح يتعدل او ينحزف ورح يتنبه العضو المذنب
تالت شي تنزيل موضوع مكرر رح يتنبه العضو وينتقل الموضوع على السقيفة
رابع شي اللي بيخرج عن الموضوع رح يتنبه مع حزف الرد

هاي بنظرة عامة القوانين اللي موجودة باخوية
هلأ الكلمة الاهم قوانين اخوية ليست دستور دائم وهيي وليدة المرحلة يعني قابلة للتعديل في اي لحظة مو ضروري من خلال موضوع منفرد ممكن من خلال ردود المشرفين وتنبيهاتن الدائمة

انشالله تكون مفهومة
اي تساؤل ممكن تطرحو هون و رح يجاوبوكن المشرفين :سوريا:

وبتمنى ترجع اخوية متل ما كانت واللي كان الكل يحبا :hart:

لاوديسا

06/06/2006, 09:20

علوم : بيتفرع عنو :

2- لغات : يتضمن دروس لتعليم اللغات الانكليزية العربية والاشورية

طيب وباقي اللغات
يعني لو تضيفو لهالقسم جزء تسموه لغات اخرى
متل الالمانية مثلا
وانا مستعدة حط كل يوم كام كلمة يعني متل دروس اولى
اسمو كاس العالم عالابواب :p
بلكي بتستفيدو اذا بدكن ها :سوريا:

hanny dagher

06/06/2006, 09:23

طيب وباقي اللغات
يعني لو تضيفو لهالقسم جزء تسموه لغات اخرى
متل الالمانية مثلا
وانا مستعدة حط كل يوم كام كلمة يعني متل دروس اولى
اسمو كاس العالم عالابواب :p
بلكي بتستفيدو اذا بدكن ها :سوريا:

طيب انا رح اطرح الموضوع بالمشرفين وانتي كمان طرحي بالبريد ومنشوف شو بيصير :سوريا:

Barleb

06/06/2006, 10:27

تابع :

درجة تانية : مايلي :
1 - السقيفة : تحتوي المواضيع المكررة مواضيع العلقات مواضيع ما الها طعمة كلها منزتها على

خيو .. دبرولنا محل مشان الشباب الملحدة .. يعني حلوة حاتطينا بـ السقيفة . هيي صحي حلوة .. بس يا أخي في شي غلط

صياد الطيور

06/06/2006, 12:00

يا ويلي ي... قسما بالله كأني عم أسمع خطاب أنقلاب .. وهادا الدستور الجديد للكونغرس الأخوي

على راسي معلم ... عُلم ...

وعلى الجميع التنفيذ ... وأي مخالفة يتعرض صاحبها لأقصى العقوبات .. التي قد تصل للإعدام

Willi

06/06/2006, 18:43

خيو .. دبرولنا محل مشان الشباب الملحدة .. يعني حلوة حاتطينا بـ السقيفة . هيي صحي حلوة .. بس يا أخي في شي غلط

لا انتو كفرة وزيادة عليكون السقيفة

مشكور ابو الهن
بس في مشكلة
انو اللي عم يعفس بالاقسام ما رح يقروه
واللي بيعرفو قوانين اخوية هني بس اللي رح يقروه

Gazita

06/06/2006, 20:37

merci hanny:سوريا:

Majood

06/06/2006, 21:28

اطالب بالتثبيت .. حيو هاني :gem:

فيروزة

07/06/2006, 00:23

يعطيك العافية هاني

mazoun

07/06/2006, 00:30

ميرسي كتير

Barleb

07/06/2006, 00:32

لا انتو كفرة وزيادة عليكون السقيفة

يلعن ربك :clap:

فيروزة

07/06/2006, 00:39

يلعن ربك :clap:
الله يهديك

Barleb

07/06/2006, 00:43

الله يهديك
مين الله :? .. يعني هوي مشترك بـ أخوية ولا بدو يهديني عـ الماسنجر

Willi

07/06/2006, 01:05

مافي داعي تقلبو الموضوع

marioma alghzayala

07/06/2006, 11:29

شكرا هاني ..يعطيك العافية .. :king:

ABU WILLIAM

09/06/2006, 00:43

شو أبو الهن مبروك الأخضر و عقبال الأحمر بس حاسس حالي قاعد بمدرسية خفف القونين شوي

jida

09/06/2006, 02:16

ميرسي هاني .. عنجد هاد الشرح بالتفصيل كتير فادني :سوريا:

Kakabouda

10/06/2006, 19:10

شكراً عالموضوع المهم و ان شاء الله ترجع الأخوية متل ما كانت :hart:

Willi

10/06/2006, 23:16

مافي امل

hanny dagher

11/06/2006, 10:31

مافي امل

معلم بتتذكر وقت قلتلك بدي نزل هالموضوع شو قلتلي

قلتلي رح يروح شغلك على الفاضي لا تعزب حالك
بس انا تحيونت وجحشت ونزلتو قلت بلكي هالعالم بتفهم على حكي الله اللي خلقنا وبتزبط شوي

marioma alghzayala

11/06/2006, 10:36

محشوم هاني ..:?

hanny dagher

11/06/2006, 10:45

محشوم هاني ..:?

لاء ماني محشوم لو ماني حمار وحمار كبير كمان ما بكون اسعتني لهلأ هون

marioma alghzayala

11/06/2006, 10:46

لك هاني شبك ؟؟ طول بالك ...يوه ...:shock:

hanny dagher

11/06/2006, 10:48

لك هاني شبك ؟؟ طول بالك ...يوه ...:shock:

مطول بالي والله يا مرام ما بقى شي يستاهل
يعني ما بعرف اذا لاحظتي انو انا معدني متل اول
وانشالله اسا شوية تانية وبصير مو متل هلأ
وشوي وشوي منقلكن باي باي
يعني انشالله قريبا

marioma alghzayala

11/06/2006, 10:50

اي لاااا :jakoush: .. ولي عليك:jakoush: .... لا تستسلم .... :gem: .... الا ما تصير شي اعجوبة:? وينقلب الوضع ...:cry:

لاوديسا

11/06/2006, 11:02

هوي معروفة شو القصة
بس شو القصة :?
عم اسال سؤال العارف :cry:

hanny dagher

04/08/2006, 06:11

up......................................

رح ارجع انكش هالموضوع مشان هالكم عضو الجداد يفهمو علينا شو اسلوب العمل وشو الشروط وشو هني الاقسام

كلمة تانية هلأ معد في مزح يا بدنا نرجع متل ما كنا يا اما بدو يصير شي ما بيعجب العالم
والله العظيم والله العظيم والله العظيم
اللي ما بدو يلتزم ماني راحم حدا عداد التنبيه بدو يرتفع بشكل رهيب واللي بدو يعترض او يستفسر بدي ارفعو بزيادة
بجوز ما اقدر احزف او انقل المواضيع بكل الاقسام بس بقدر اعطي تنبيهات وهادا اللي رح يصير

عيب والله عيب رح تجلطونا خلص هاي القوانين عجبك اهلا وسهلا ما عجبك الباب الواسع اللي فتحنالك يا مشان تفوت بيطالعك كمان

ابو المجد الموضوع تحت تصرفك ساوي اللي بدك يا عدل حزوف نقلو بس المهم لبين ما تفوت بيكون عدد منيح قرو الموضوع :D

maro18

04/08/2006, 06:21

هانى لية زعلان كدة مافيش حاجة مستاهلة يعنى بهدوء كل شىء ممكن ينحل
وبعدين فى تفرقة بين اللى بيخالف القوانين بقصد او انه بسبب جهل بيها وماينفعش الاتنين يتساوا

شام1989

04/08/2006, 06:28

خلص hanny dagher هون كلياتنا حبابين ومنسمع الكلمة
ومالو داعي التنبيه:cry:
maro18 ما قصدها
عن جد كلنا حبابين:(

hanny dagher

04/08/2006, 06:29

هانى لية زعلان كدة مافيش حاجة مستاهلة يعنى بهدوء كل شىء ممكن ينحل
وبعدين فى تفرقة بين اللى بيخالف القوانين بقصد او انه بسبب جهل بيها وماينفعش الاتنين يتساوا

يا اختي معد في رواق
وانا رجعت نكشت الموضوع مشان ما يبقى حدا في عندو جهل بهالقصة وبصير ما بتندم اذا استخدمت عداد التنبيه

حاجي ملينا من هالوضع اذا انتو عاجبكن في عالم كتير مو عاجبا والمنتدى صار لازملو نفضة

maro18

04/08/2006, 06:32

انك تظهر الموضوع تانى بجد فكرة كتير حلوة عشان الكل ياخد بالوا منها
عموما مشكور واذا كنت اغضبتك او اى حدا اخر ... اقدم اعتذارى

Willi

04/08/2006, 08:21

والله يا معلم
صدقني مافي غير هالحل

بالعصاي

شعبنا هيك تعود وما رح يمشي الحال معو غير فيها;-)

TheLight

04/08/2006, 09:11

هاد الحكي المظبوط
اسلخ لا ترحم
وخلي العصا ل يلي عصا
انا موافق بس حاسس حالي اول واحد راح طير

gabo

04/08/2006, 15:01

قوانين اخوية والخطوط العامة :

ممنوع كتابة اي موضوع في غير قسمو كيف بعرف اينو قسمو بسال هالكام عضو القديمين باخوية يعني مشرفين وكل من سجل بسنة 2005 لحد الشهر التاني من 2006 لانو هدول بيكون بيعرفو الاقسام بشكل منيح شو هيي
ممنوع نكش اي موضوع تجاوز الصفحة التانية بالقسم الا اذا كان ما زال فعال
ممنوع الخروج عن المواضيع بحديث وسبام الا في الاقسام التي تتحمل ذلك يعني ما نجي نطلع عن الموضوع ونصير ننكت ونهرج بالمنبر
ممنوع تنزيل مواضيع دينية في اي قسم او اي موضوع بيشم ريحة الدين يعني كل شي بيتعلق بالدين هادا بينك وبين حالك ولازم يضل بينك وبين حالك واي موضوع بينزل بينتقل على السقيفة اذا ما انحزف
ممنوع مهاجمة اي دين او طائفة او ملة او عقيدة موجودة بالمنتدى حتى الملحدين لا بهدين ولا بقرب علين ما بدك تكون ملحد التهي بحالك وتروك غيرك في مين بيحسابو
ممنوع مهاجمة اي عضو من الاعضاء بشكل جارح او استخدام كلمات نابية خارجة عن اخلاق المنتدى كلنا شباب وصبايا جامعيين ومثقفين ومنفهم بالحوار ما في داعي للتجريح ببعض
ممنوع تنزيل مواضيع مكررة وكيف بدي اعرف اذا مكررة او لاء بسال هالكام عضو القديمين باخوية يعني مشرفين وكل من سجل بسنة 2005 لحد الشهر التاني من 2006 لانو هدول بيكون بيعرفو المواضيع المكررة شو هيي
بالنسبة للمنبر الحر بتقدرو تلاقو القوانين بهالموضوع بينضاف اليها القوانين اللي حططيتا فوق ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////هلأ اي مخالفة لهالقوانين من مين من كان
اول الشي اذا خالف بتنزيل موضوع الموضوع رح ينتقل للقسم المناسب ورح ينزاد التنبيه للعضو المخطئ
تاني الشي اذا خالف برد الرد رح يتعدل او ينحزف ورح يتنبه العضو المذنب
تالت شي تنزيل موضوع مكرر رح يتنبه العضو وينتقل الموضوع على السقيفة
رابع شي اللي بيخرج عن الموضوع رح يتنبه مع حزف الرد

هاي بنظرة عامة القوانين اللي موجودة باخوية
هلأ الكلمة الاهم قوانين اخوية ليست دستور دائم وهيي وليدة المرحلة يعني قابلة للتعديل في اي لحظة مو ضروري من خلال موضوع منفرد ممكن من خلال ردود المشرفين وتنبيهاتن الدائمة

انشالله تكون مفهومة
اي تساؤل ممكن تطرحو هون و رح يجاوبوكن المشرفين :سوريا:

وبتمنى ترجع اخوية متل ما كانت واللي كان الكل يحبا :hart:
يعني ليش عم تعزب حالك جناب متل الطناب كأنك عم تحاكي الحيطان
بس معلش يسلمو إلا ما يكون شي حدا بيفهم

Reemi

10/09/2006, 16:10

UP UP UP UUUP

Gazita

10/09/2006, 16:20

اجا بوقتو تانكس ريمي عل up

Reemi

10/09/2006, 16:29

اجا بوقتو تانكس ريمي عل up
8) 8) 8) 8)

hanny dagher

10/09/2006, 21:23

معلم tiger حطلنا جملة الشهيرة من الصالون على هالموضوع

ضيعان التعب في بس

المستحيل

10/09/2006, 21:36

مشكور يا هاني معلم مشكور

Reemi

10/09/2006, 22:56

معلم tiger حطلنا جملة الشهيرة من الصالون على هالموضوع

ضيعان التعب في بس
انا باريي يكتب...تم التثبيت :D

hanny dagher

10/09/2006, 23:18

انا باريي يكتب...تم التثبيت :D

كتبا مجد قبلو وما استفدنا شي
الشعب اللي ما بدو يفهمو اذا بتلقمي ياها بالمعلقة ما رح يفهم

Reemi

11/09/2006, 00:13

كتبا مجد قبلو وما استفدنا شي
الشعب اللي ما بدو يفهمو اذا بتلقمي ياها بالمعلقة ما رح يفهم
طيب بنجرب شي غير المعلقه...:lol:
ع كل حال انا بقترح...بكل موضوع ... اذا ما محله محل ما مطروش...نطرش نحنا اللينك تاع هالموضوع :D

mhbder87

11/09/2006, 00:17

الله يعطيك العافية يا معلم
يستر على عرضك لا تجمل الكل
والله في عالم بتفهم
عن جد لفت نظري هالمنتدى من بين كتير من المنتديات
على فكرة انا عضو بكتير من المنتديات السورية و في أحد المنتديات صرلي عضو فيه شي 4 سنين تقريبا
الشعب اللي موجود بباقي المنتديات مو متل هون يا اخي في عالم بتنحط عالعين والراس بس في عالم يااخي مو طبيعين مع احترامي للجميع
الردود تبعهن استفزازية و مواضيعن استفزازية
وفي شغلة بدي قولها يعني ما في مراقبة للمواضيع تماما لأنو الشباب معت عندون غير الحب يفتحو سيرتو بتلاقي بالصالون شي 40 موضوع عن الحب وكلون متل بعضون
او بيتعرضو لنفس الافكار
وبدي اذكر شغلة انو الواحد مو اجباري انو يرد بس وقت بدو يرد يفكر شوي و يوزن كلامو
صحي انا جديد عالمنتدى بس كل يوم عم افتح كل المواضيع بأخوية وانشالله شهر و بكون قاري كل شي بالمنتدى
وعذرا ان اطلت او خرجت عن الموضوع

hanny dagher

12/09/2006, 01:07

الله يسامح اللي ثبت الموضوع :pos:

Gazita

12/09/2006, 01:28

الله يسامح اللي ثبت الموضوع :pos:
اي منيح اللي ثبتوه شو بيك زعلان ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

أبو الجماجم

21/09/2006, 04:44

كلشي ما تحكي مظبوط
أنا و نحن و كلنا و يالطيف معك ...!!
روج شايفلك...!!

Reemi

21/09/2006, 09:51

من وين طلعت انت :shock: